Elke ouer moet tydens die opvoedingsproses van hul kind verskeie keuses uitoefen. Die keuse van 'n skool is seker een van die belangrikstes in hierdie proses. Naas die opvoeding wat u kind by u as ouer ontvang, is die skool die grootste rolspeler in die vorming van u kind se waardestelsel. Juis daarom kan u gemaklik voel oor u keuse van Laerskool Fontainebleau, die skool waaraan u, u kosbaarste besitting, u kind, toevertrou het om hom/haar voor te berei vir die talle toenemende eise wat die wêreld aan ons stel. Laerskool Fontainebleau streef daarna om die beste Afrikaanse Christelike Laerskool te wees, waar elke kind se potensiaal deur kwaliteit onderwys en ondersteuning op alle vlakke van die opvoedingsproses ontwikkel word. Uitsaande prestasies op akademiese, kulturele en sportgebied word jaarliks by die skool se ryke geskiedenis van meer as 100 jaar gevoeg. Hierdie prestasies word moontlik gemaak deur onbaatsugtige onderwysers wat hul jarelange ondervinding in die onderwys aanwend tot voordeel van ons kinders. Dit is 'n voorreg vir die Beheerliggaam om u te verwelkom as lede van die fonties-familie. Ons wil u ook aanmoedig om betrokke te raak en betrokke te bly by Laerskool Fontainebleau en u kind se ontwikkeling. GERHARD VILJOEN VOORSITTER: BEHEERLIGGAAM | 
